圓滑

唔知大家公司中,是否都有以下情況會發生

同事A電話響起,
同事A:「喂,係~係你好呀X先生/小姐,係係係,哦~個件事嘛,就咁咁咁...係係...」

係一個電話對話中,你會聽到幾千個好肯定語氣既係字,
而且你每講一件事對方都會話知道,明白,好清楚...如此這般...
但係往往都係呢類人先會經常誤會你意思...或未能完成工作...
與同事A相處都幾個寒暑,
我曾經都有問過點解成日講野語氣都話明白,知道呢類字句
佢答我,希望俾到人一個圓滑既印象,.有時同對方話唔明又唔好意思,所以先答左明白先.
身邊甚至有同事以讚揚口氣「同事A真係好世界仔!」

個人感覺,"世界仔"呢個形容詞係負面多於正面,
如果你真係圓滑得令別人同你相處溝通得好舒服,
形容你既詞語應該係"呢個人好好人,好NICE,好易話為..."
人地認為你"世界仔"係唔係因為人地感覺到你只不過係硬銷你的隨和?根本就係一個面具呢?
在我眼中,"世界仔"係夾雜好多表面功夫既意思入去..

我唔清楚係咪我太介懷別人既形容,
但如果咩都唔知扮知,而且為左建立形象先去做人,
我寧願我永遠都唔圓滑,
而且可能我好分清楚工作上的夥伴還工作黟伴,
我同佢地相處時間之中我就係要完成我的工作,
根本就唔容許我唔明扮明,等有問題發生時再問
我認為,問人問題要問得圓滑先係最難,而唔係人地問你問題時.
問一個問題,令人覺得你唔怪責,又唔係卸責而樂意與你合作解決困難,
應該係真正圓滑之道吧!!

而且好似同事A般經常唔清唔楚既同時,拖慢工作效率,
其實係咪變相得罪老闆呢?
咁...唔係離同事A要圓滑的目標愈行愈遠嗎?